X'inhu l-Unicode?

L-Unicode jipprovdi numru wieħed għal kull karattru,
għal kull magna,
għal kull programm,
għal kull lingwa.

Fundamentalment, il-kompjuters jagħrfu biss numri. Huma kapaċi jaħżnu l-ittri u karattri oħra billi jagħtu numru għal kull ittra. Qabel ma l-Unicode kien ivvintat, kien hemm mijiet ta' sistemi differenti li jgħaqqdu n-numri mal-karattri. Ebda sistema ma kienet kapaċi tieħu biżżejjed karattri: per eżempju, tant hemm lingwi fil-pajjiżi ta' l-Unjoni Ewropeja li sistema waħda m'hix biżżejjed biex tkopri l-lingwi kollha. Anki għal lingwa waħda bħall-Ingliż ebda sistema ma kienet tlaħħaq ma' l-ittri, punteġġatura, u simboli tekniċi komuni.

Dawn is-sistemi ma kienux jaqblu ma' xulxin peress li l-istess numru jista' jintuża għal żewġ karattri differenti minn żewġ sistemi differenti, jew l-istess karattru seta' jkollu numri differenti f'sistemi differenti. Kull kompjuter (speċjalment is-servers) jeħtieġ li jissaportja ħafna tipi differenti ta' sistemi ta' rappreżentazzjoni tal-karattri; iżda kull meta l-informazzjoni tiġi kkupjata minn sistema għal oħra, dejjem ikun hemm riskju kbir li din l-informazzjoni tinbidel aċċidentalment.

L-Unicode qed ibiddel dan kollu!

L-Unicode jipprovdi numru wieħed għal kull karattru, għal kull tip ta' kompjuter, programm jew lingwa. L-istandard ta' l-Unicode qed ikun adottat minn kumpaniji b'saħħithom bħal Apple, HP, IBM, JustSystem, Microsoft, Oracle, SAP, Sun, Sylax, Unisys u ħafna oħrajn. L-Unicode huwa meħtieġ minn standards moderni bħal XMS, Java, ECMAScript (Java Script), LDAP, CORBA 3.0, WML, etc., u huwa l-mod uffiċjali ta' kif timplimenta l-ISO/IEC10646. L-Unicode huwa issapportjat f’ħafna operating systems, browsers moderni u ħafna prodotti oħrajn. Il-miġja ta' l-istandard ta' l-Unicode, u aċċess faċli għal programmi li jissaportjawh, huma wħud mill-iktar xejriet globali importanti u reċenti fil-qasam tas-softwer.

L-Unicode iwassal għal roħs fl-iżvilupp ta' sistemi client-server jew programmi multi-tiered u ta' siti tal-Internet meta jitqabbel ma' l-użu ta' sistemi ta' rappreżentazzjoni tal-karattri antiki. L-Unicode jippermetti li prodotti ta' softwer jew websites jkunu jahdmu kif suppost fuq magni ta' tipi differenti, u b'lingwi u f'pajjiżi differenti mingħajr ebda modifiki. L-informazzjoni tkun tista' tintuża minn sistemi differenti mingħajr ebda tibdil u bla tbatija ta' xejn.

Il-Konsorzju ta' l-Unicode

Il-Konsorzju ta' l-Unicode huwa organizzazzjoni li taħdem bla profitti li twaqqfet bil-għan li tibni, ssaħħaħ u tmexxi 'l quddiem l-użu ta' l-istandard ta' l-Unicode li jispeċifika kif il-karattri għandhom ikunu rappreżentati fi prodotti ta' softwer u standards moderni. Il-membri tal-konsorzju jirrappreżentaw firxa wiesgħa ta' korporazzjonijiet u organizzazzjonijiet fl-industrija tal-kompjuters u ta' l-informatika. Il-konsorzju huwa ffinanzjat totalment mill-miżati tal-membri. Is-sħubija fil-Konsorzju ta' l-Unicode hija miftuħ għall-organizzazzjonijiet u individwi kollha madwar id-dinja li jixtiequ jappoġġjaw l-istandard ta' l-Unicode u jgħinu fit-tkabbir u l-implimentazzjoni tiegħu.

Maltese translation by Angelo Dalli and John Axiak

---